San Joan Saria
San Joan eguna egun handia da Tolosan. Txistulariak, eskopetariak, erraldoi eta buruhandiak, aurreskua... tradizioa eta ikuskizuna batzen dira herriko patroiaren egunean. Eta ez da hor amaitzen dena. Egun horren inguruan herriko jaiak ospatzen dira eta hainbat eta hainbat kultur, musika nahiz kirol ekitaldi antolatzen da.
Xakeak ere badu bere txokoa San Joan jaietan: San Joan Saria. Gipuzkoa nahiz inguruko lurraldeetako xakelari hoberenek Tolosa izaten dute beren topagune eta lauko taldetan banatuta nor baino nor aritzen dira xake azkarrean.
1974ean ospatu zen lehen San Joan Saria eta ordutik hona, hutsik egin gabe, urtero jokatu da herriko xakelarien artean hain estimatua den txapelketa hau. Tolosa-Ibarra Chess Team web guneko atal honek San Joan Sariaren nondik norakoak jaso nahi ditu.