Baten batek esan zuen errealitatea aldatzeko errealitatea bera ezagutu behar dela, edo bederen, saiatzea diogu guk. Hori da gure asmoa, eta Barakaldo euskaldundu nahi dugunez hizkuntza eta gizartearen egoera ahalik eta hobekien ezagutu nahi dugu.

Lehendabiziz pasa den urteko datuak aurkituko dituzu eta geroago ondorio batzuk azalduko ditugu, baina aurrez ohar: benetan deigarria irakaskuntza pribatuan zein publikako Lanbide Heziketan D ereduak daukan ehunekoa: %1 !!!!!

 

 

SASIBURUREN IRAKURKETA

Joera handia dago euskal irakaskuntzaren garapena Barakaldon baikor ikusteko, sare publikoan A eredua behera doala argudiatuz, baina hau errealitatearen ikuspegi murriztua baino ez da, eta emaitzak ez dira oraindik euskaltzaleok nahi genituzkeenak. Eta oinarri logikoak daude geure buruari galdetzeko ea posiblea den Barakaldo euskalduntzea, aurrean ikusi eta jarraian laburbitzen ditugun irakaskuntzaren datuekin:

1) Ikaslegoaren ia erdiak (5.864) sare PRIBATUAN ikasten du eta ikastetxe hauetatik batek ere ez du D eredua eskaintzen, eskaintza nagusia A eredua izanik: euren ikaslegoaren %72.

2) PUBLIKOAN A ereduaren beherakada begibistakoa da, baina D eredua ez da behar beste indarrik hartzen ari (%51 soilik Haur Hezkuntzan, %45 Lehen Hezkuntzan, %29 DBHn, Batxilergoan bakarrik %22 eta Lanbide Hezkuntzan %1 baino gutxiago).

Datu orokorrak hartzen baditugu eta Bizkaia edota EAEkoekin erkatzen baditugu oso emaitza esanguratsua dugu: Barakaldoko B ereduaren ehunekoa Bizkaia eta EAEko D ereduaren portzentaiaren antzekoa da, eta alderantziz ere, D ereduaren portzentaia Bizkaia eta EAEko B ereduarena; hau da, Bizkaian eta EAEn orokorrean D eredua igotzen den heinean, Barakaldon irakaskuntza B eredura bideratzen ari da, benetako euskalduntzea bermatzen ez duen eredua eta behin Batxilergora iritsita A eredura desbideratzen dena.