Hizkuntzen Europako Eguna zela-eta, hainbat ekitaldi antolatu zituen Barakaldoko Euskal Herrian Euskaraz taldeak irailaren 29an.
Jakina denez, gure hizkuntzaren egoera kaskar samarra da Barakaldon, eta euskaldunok egunero ikusten dugu gure eskubideak ez dituztela errespetatzen.
Egoera hori salatzeko, eta gure herrian etengabe nozitzen dugun eskubideen urraketa gogorarazteko, Barakaldoko hainbat toki esanguratsu aukeratu zituzten EHEko kideek. Ekitaldiak goizeko 12etan hasi ziren udaletxearen aurrean, eta han “Udal aldizkaria euskaraz!” zioen pankarta bat erakutsi zuten zenbait lagunek. Gogoratuko duzue, Barakaldoko udal aldizkaria izan da azken bolada honetan zeresanik handiena eman duen kontua, bertan euskara eta euskaldunak bazterturik izaten garelako eta hori salatzeko Alkargunean biltzen diren elkarteek kanpaina bat abian jarri dutelako. Geroago, hamabost minutuko beste agerraldi bat egin zuten epaitegiaren aurrean, “Euskaldunontzat ez dago justiziarik” lelopean.
Osasun arloan ere, zail izaten da euskaldunon eskubideak aintzat har ditzaten, eta horregatik San Eloy erietxea aukeratu zuten hirugarren agerraldia egiteko. Oraingoan, “Osakidetzan euskara gaixorik” izan zen aukeraturiko leloa. 13:30etan La Milagrosa ikastetxearen aurrean “Eskolak euskaldundu behar du” zioen pankarta erakutsi zuten, eta handik Barakaldo Antzokira joan ziren. Barakaldo Antzokiak duela gutxi aurkeztu du datozen hiru hileetarako egitaraua, eta bertan ez da ekitaldi bakar bat ere euskaraz. Gainera, aldizkari bat plazaratu du, erdara hutsez dagoena, eta horregatik beste pankarta bat agertu zuten antzokiaren aurrean, “Bazterketarik ez!” esaldiarekin. Ekitaldiak amaitzeko, udaletxearen aurrean bildu ziren berriro, “10.000 biztanleen eskubideak, non daude?” lelopean.

Ekitaldiak EHE erakundeak antolatzen zituen, baina beste elkarte eta euskaltzale askoren laguntza ere izan zuten. Sasiburuko kideek, zelan ez, bat egin zuten aldarrikapen horiekin, eta musikari gazteek ere alaitu zituzten ekitaldiok. Ikusten duzuenez, salaketa eta gogoetarako hitzordua izan zen. Hizkuntzen eguna igaro da, baina problemek hor diraute. Orain, eguneroko lanari lotzea dagokigu.