Ciclos, jatetxe kolonbiarra

Orain dela bi hilabete eskas Barakaldoko kolonbiar batzuei taberna bat irekitzea burutatu zitzaien. Hasiera batean, originalak izateko ireki zuten arren, orain Kolonbiako janari mota guztiak eskaintzen dizkiete euren bezeroei, esaterako: oilo edota buztanaren Sancocho, erraietako salda, patata beteak,...
Janariaz gain, Kolonbiako zenbait edari ere prestatzen dute. Ospe handikoak dira euren zapore guztietako zukuak, esne eta herrialde horretako fruta izoztuaren mamiz egindakoak.
Jabeak dioenez, taberna honek bere giro alaian eta musikan dauka bere xarma, eta batez ere, honek erakarrita inguratzen da jendea.
Oraingoz dekoratzen bukatzeko denbora nahikorik izan ez badute ere, oroigarri tipiko batzuk topa ditzakegu bertan, eta beharbada deigarriena izan daitekeena: Kolonbiako ordu zehatza jotzen duen erlojua.

 

O´Connor, taberna irlandarra

Taberna hau duela bost urte ireki zuten. Jabeak asko atsegin du Irlanda eta maiz joaten da bertara. Garagardoaren negozioan sartuta zeuden ezagun batzuek proposatu zioten taberna irekitzea eta halaxe egin zuen. Garai hartan modan zeuden horrelako lokalak, izan ere pilo bat daude inguru hauetan, baina Barakaldon O'Connor izan zen aitzindaria, eta hasiera-hasieratik jende dexente hurbildu izan da giro lasai eta musika atseginaren bila, horixe baita taberna honen filosofia. Bezeroak 30 urtetik gorakoak izaten dira eta bertan aurkitzen dituzte inportazioko garagardoak (20 marka baino gehiago), kafe irlandarrak eta te mota ugari.
Jabeak kontatu digu irlandarrek gehien edaten dutena garagardoa dela (munduko bigarren kontsumitzaileak dira, txekiarren atzean). Garagardoarekin batera sagardo gasduna da edari ohikoena. Likoreak eta beste edari biziek, berriz, prezio garestitxuak dituzte eta ez dira hain kontsumituak.
Astean denetariko musika entzutea badago ere, giro irlandarra bultzatzen saiatu dira, musika zeltiarreko kontzertuak antolatuz. Gainera folk klub bat sortu dute eta batzuetan elkartzen dira musika egiteko.

 

Kamberra, taberna australiarra

Taberna hau bakarrik duela 8 hilabete ireki zuten. Iruñean horrelako taberna bat ikustean jabea animatu zen, Barakaldon ez zegoelako antzekorik. Ideia berria eta originala zen. Lokal honetako bezeroen artean denetarik dago, eta hona sartzen dira gauza desberdinen bila, kafeak, menuak, garagardoak eta abar eskaintzen baitira. Tabernako hormak irudiz josita daude eta dekorazioak Australia natibora eramaten gaitu. Astean zehar pintxoak, kafeak eta menuak jartzen dituzte gehien bat, baina igandeetan kanguru azpizuna ere prestatzen dute.Jabeak azaldu zigun behin bi australiar sartu zirela hara eta harrituta gelditu zirela apainketa zela eta. Leku berezi hau ezagutzeko gogoa baldin baduzu, hara hurbildu eta atalondoan dagoen Leopoldo kokodriloak ongi etorria emango dizu.

Kurhaus, jatetxe alemaniarra

Duela ia hiru urte garagardo marka ezagun batek bidaia bat antolatu zuen Alemaniara. Jose hara joan eta berehala animatu zen jatetxe alemaniar hau irekitzera. Zergatik? Barakaldon ez zegoelako horrelakorik. Josek dioenez bere tabernara gazteak zein nagusiak sartzen dira, hori bai, gehienak Barakaldokoak, eta guztiak gauza berrien bila. Behi erotuen kontua zela eta ostruka, oreina eta kangurua hasi ziren eskaintzen. Janaria Alemaniatik ekartzen dute eta garagardoetan hainbat marka alemaniar dituzue eskura. Jabeak dio Barakaldoko jendea uzkurra dela gauza berriak probatzeko orduan, beraz, animatzen bazarete egin kasu chefari eta txerri-ukondoa eskatu.

 

Jatetxe galiziarra

Herminio A Coruñako Curtis herrikoa da. OporretanBarkaldora etortzen zen bere anaia bisitatzera, eta halako batean, duela 28 urte, taberna hau hartzera animatu zen . Lehengo taska baten itxura du oraindik, zaharra eta oso atsegina, xarma handikoa (48 urte darama irekita!). Jendea olagarroa eta Galizako espezialitateak jatera dator. Herminiok azaldu zigunez, bezeroetan barakaldarrak galiazarrak baino gehiago dira, azken batean bertokook eta Galizakoak antzekoak baikara haren ustez: tripaundi hutsak. Horrexegatik dio Barakaldokook asko estimatzen dugula hango janaria, eta zaila dela jate-kontuetan gu engainatzea. “Galicia” tabernak ez du sofistikaziorik eskaintzen, baina Erminioren ustetan kalitatearen bidez erakartzen du jendea. Edarien artean asko duzue aukeratzeko: ribeiroa, albariñoa, orujoak eta, neguan, queimada. Taberna honetan afaltzera animatzen bazarete, ez ahaztu olagarroa eskatzea, katxeloekin edo katxelorik gabe.

 

El Botxo, jatetxe kubatarra

Jendeak bestera pentsa lezakeen arren, El Botxo jatetxeko sukaldariak azaldu digu Kuban ere gastronomia aberatsa egon badagoela. Guri hori erakusteko asmoz, duela 8 urte jatetxea irekitzea erabaki zuten. Handik aurrera jende anitz hurbildu zaie eta guztira 405 bat afari zerbitzatu dituzte. Hara inguratzen bazarete, kontuan hartu behar duzue 10-14 lagunentzako afariak egiten direla, eta beti ere aldez aurretik eskatuta, sukaldariak azaldu digunez, osagaiak oso garestiak baitira, eta gehienetan hango platerrak prestatzeak denbora luze dakar. El Botxon dasta ditzakegun plater guztien artean zaila da aukeratzea, beraz, chefak gomendatu digun menua plater ezberdinek osatuta dago: entsalada hotza, yuca (patata mota bat), malanga (tuberkuluak), arroza grirekin, otarrainska txilerekin eta arroza zuriarekin nahastua, eta txerri errea (laranjez eta alga goxoez).

 

Gilen Mejuto eta Tatiana