Euskarri 10

BARAKAAAAAAAAA....EUP!!!

Gure herriak bere futbol taldea dauka ia duela mende batetik, barakaldarrok maiz ahaztuta edo erdi ahaztuta izan badugu ere. Aurten Barakaldo inoiz baino hobeto dabil. Badarama 15 jornada baino gehiago mailako lehenbiziko postua utzi gabe, eta sekulako ahaleginak egiten ari da 2.Ara pasatzeko. Ez da errenta makala dream team delakoen artean inoiz egon ez den talde xume batentzat. Aupa Baraka eta eutsi goiari!!!! Baietz aurten lortu!!!

BARAKA CF: BEGIRATU LABUR BAT HISTORIA LUZE BATI


Zelai zaharra suntzitzen	Estadio berria	Zelai berriaren maketa

1917: Barakaldo CFren fundazioa

1917-1918: Nicolás Redondo, UGTko idazkari ohiaren aita, Barakaldo CFren lehenengo lendakaria.

1919: Lasesarreko futbol zelaia inauguratu zen.

1938-1939: Kopako finalerdira iritsi zen Barakaldo.

1952-1953: Barakaldo, Koparen final laurdenetan

1953-1954: 1. mailara igoteko promozioa jokatu zuen.

1971-1972: Pauleseko areto nagusian egindako Batzarrean batzorde bat eratu zen, Lasesarreko argi elektrikoaren instalazioaz arduratzeko. Horrek ekarriko zituen gastuak ordaintzeko 500 pezetako txartelak jaulki ziren, eta bazkide ugarik erosi zituzten.
Itsasadarraren marea gorak eraginda, zelaia batez ere iparreko aldea- ureztatuta geratzen zen sarritan. Arazoa konpontzeko, beharrezko drenaje sistema instalatu zen.

1972-1973: Egun Bizkaiko Futbol-Federazioko burua den Bañares jn. klubaren lehendakaria zelarik, bazkideen kopurua 5000tik gora igo zen.

2000-2001: Lasesarreko lehengo futbol zelaia eraitsi zen.

2003 edo 2004: “Lasesarre Berria” inauguratuko da..

BA AL DAKIZU NOR DEN???? Noizbait entzun baduzu Lasesarren Barakaaaaaaaaaaaaaaaaaldoooooo... EUP!!! gerra ohiua, egon ziur José Luis Fernándezek bota duela

Barakaldon jokatu duten hainbat futbolari famatu

Canito (Barakaldon jaioa): Internazionala

Goikoetxea (Barakaldon jaioa): Internazionala

Lafuente (Barakaldon jaioa): Internazionala

Clemente (Barakaldon jaioa)

Fernández (Barakaldon jaioa)

Dani: Internazionala

Gorostiza: Internazionala

Iriondo: Internazionala

Lezama: Internazionala

Oceja: Internazionala

Sáez: Internazionala

Sarabia: Internazionala

Zarra: Internazionala

Beitia

Eskalza

Barakaldo CF zenbakietan

Denboraldiak 3. mailan: 22

Denboraldiak 2. mailan: 31

Denboraldiak 2.B mailan: 18

Gaur egungo bazkide kopurua: ia 1900

Lehen begiratuan Pancho Villaren gerrillariak ematen badute ere, argazkikoa Barakaldo CFren futbol taldea da 20ko hamarkadan.

ELKARRIZKETAK

Roberto Gijón
Barakaldo CFko Fresidentea

Barakaldar honek 52 urte ditu eta 7 urte darama Barakado CFko presidente. Bere agintaldia datorren urtean bukatuko da, baina berak espero du ordurako taldea 2.An egotea. Presidente denetik bost play off jokatu dituzte eta aurtengoa seigarrena izango da. Bere ustez, klubak helburu bat du oraindik ere betetzeko: 2.Ara igotzea hain zuzen. Burubelarri harrapatu dugu bere barakaldoren bulegoan, baina gurekin hitz egiteko tartetxoa izan du.

Aurten kanpaina egiten ari zarete bazkideak lortzeko. Esan nahi du horrek Barakaldoko afizio ez dela behar bezain zalea?

Bai, egia da. Kanpaina egiten ari gara. Jendeak futbola grina dela dio, baina nire ustez sentimendua da. Beste herri batzuetan kanpotik etorritako jendea berehala integratzen da, Barakaldon berriz, ez da gauza bera gertatzen: hemen leku guztietako jendea dugu, Industria Iraultza zela-eta Estatuko beste probintzietatik jende ugari etorri zen eta hemen bizi direnez Barakaldo CF defendatu beharko luke. Jaoitzezko barakaldarrek zein adopziozkoek sentimendu hori eduki eta beraien herriko taldearen alde egon beharko lukete. Neu ere Athletic erreferentzizko taldea izatearen alde nago, baina Bilbotik hain hurbil egoteak sentimendu barakaldarra ahuldu egin du. Denok herria maite behar dugu, herrian bertan eta herriko kolektibo guztietan integratuz, infraestrukturak eta zerbitzu hobeak eskatzen ditugun bezalaxe.

Aurten kanpaina egiten ari zarete bazkideak lortzeko. Esan nahi du horrek Barakaldoko afizio ez dela behar bezain zalea?

Barakaldo eta Bilbo bertatik bertara daude. Zale askoren ustez horrek dakar Barakaldo eta inguruko beste talde batzuk Athleticen menpe egotea, eta Athleticek ez omen du talde indartsurik nahi bere ondoan. Zer deritzozu?

Hori egia da, eta ez da egia. Athletici bazkide gehien ematen dizkion herriak, Barakaldo edo Getxo dira, Bilbo bera alde batera utzita. Horrek esan nahi du Athleticek barakaldarren babesa duela. Nire ustez, barakaldarrek babesa eman behar diote Barakaldo CFri lehendabizi, eta gero Athletici. Bestalde, Athletici komeni zaio 2.A mailako taldeak hurbil izatea. Gu 2.An egonez gero, Athleticentzat onuragarria izango da, 2.Atik zuzen etorritako jokalariak fitxatzeko aukera izango baitu, bi mailako jauzia egin beharko ez duten jokalariak izango dira.

Zelakoak dira Barakaldo eta Athletiken arteko harremanak?

Onak dira. Izan ere, duela gutxi Athleticek gure gazte jokalari bat fitxatu du, goiko taldean ez zegoena, eta espero dugu Athleticen lehenengo taldean jokatzea. Momentu honetan harramenak bikainak dira, ez dago inolako arazorik.

Eta Barakaldoko talde txikiagoekin?

Orain ez dago ez arazorik ez tirabirarik, onak dira. Gu prest gaude haiekin hitz egiteko, baina batzuetan harremanak ez dira behar bezain errezak. Ematen du nork bere buruarentzat egiten duela lan, Barakaldok ere bai, baztertu dutelako edo akaso guk geuk gure burua baztertu egin dugulako.

Zelan doa zelai berriaren proiektua?

Obrak martxan daude jadanik. Espero dugu RIA 2000k, construcciones BRUESek eta Udalak berak epeak betetzea. Horrela bada, 2003ko apirileko bigarren hamabostaldian inauguratuko dugu.

Denboraldi honetan San Bizenten ari zarete jokatzen. Eragina izan du zelaiak taldearen jokuan?

Bai, argi eta garbi. Gu ez gaude ohituta pistadun zelaietan jokatzera: arbitroari eta marrazainari egindako presioa bestelakoa da. Taldeak ezin du afizioa hain hurbil sentitu pistak tartean egonda. Horretaz gain, San Bizenteko zelaia txikiagoa da eta haizeak gogorrago jotzen du. Hau guztia ez da ona gure jokuarentzat eta jokalariek erreferentzi gutxiago dute Lasesarren baino. Alde horretatik beldur gaude, play offa San Bizenten jokatzea zaila izango da.

Barakaldok 2.A mailarako igoera lortuz gero, aldaketa ugari egon beharko dira taldean: jokalariak profesionalizatzea, fitxaje berriak... Aurre egin ahalko dio Barakaldok horri?

Bai, noski. Barakaldori gerta dakiokeen onena igotzea da. Hori, berez, dirua da. Futbol profesionaleko ligak, telebistak, publizitateak, kinielak... dirua dakarte. Gure aurrekontuan 200 milio pezeta gehiago izango genuke: hori 2.Ari eusteko adina diru da. Eredua Eibarren bertan dugu: denbora luze darama talde honek 2.An, eta 40000 edo 50000 biztanle baino ez ditu. Barakaldon, berriz, 100000 gara. Arazo bakarra dago: denboraldiaren amaieran, ekainean, Kirol Elkarte Anonimoa srtu beharko genuke, Futbol Liga Profesionalak hori agintzen duelako. Hau guztia aztertzen ari gara eta ez dut uste horrek arazorik izango dugunik.

Pello Agirreoa

- Pello Agirreoa, entrenatzailea

Pello Bermeokoa da eta jokalari zenean Athleticen, Alavesen, Tenerifen eta Linaresen jokatu zuen. Ostean, entrenatzaile egon da hainbat taldetan: Ondarroan, Aurreran, Bermeon, eta orain, bigarren aldiz, Barakaldon. Futbolean eskarmentu handiko profesionala, bada. Eguneroko entrenamendu saioa bukatzean, gurekin egon da berbetan:

Zer moduz ikusten duzu aurtengo Barakaldo?

Aurten bi faktore doguz gure alde: nahiko talde ona osatu dogu, jende lehikorragaz. Hogei lagunagaz edo gabilz, denak maila berekoak. Bestalde, galiziar eta asturiarren multzoan sartu gaitue eta hori ona izan da guretzat, euskaldunen artean asko ezagutzen dogulako alkar, baita teknika aldetik ere. Izan ere, futbol itxia da gurea, indarrekoa, eta partida guztiak derby modukoak izaten dira, gogorrak... Pontevedran, Zamoran, Leonesan eta besteetan oso plantilla ona dago, mentiladade handiagoko taldeak dira, eta horrek gehiago eskatzen deusku teknika aldetik.

Asko, ordea, kejatu egin ziren multzo horretan egoteagatik, Barakaldorentzat kaltegarria izango zelakoan...

Bai, hasieran batzuk keju ebilzan bidaiak luzeagoak zirelako eta aurrekontua ere asko altxatu zelako egun batetik bestera. Geu ere beldur ginen, zer pasako zan ez genekien eta.

Zein ezaugarri ditu oraingo Barakaldok bere alde?

Lehengora etorrita, guk nahiko indarra daukagu, hori euskaldun jokalari denek daukie buruan sartute. Teknika aldetik ere besteen parean gagoz, hortik irabazi egin dogu.

2.Ara igoz gero, ba al du Barakaldok mailari eusteko adinako indarra?

Hori esatea zaila da. Play off-a mundu bat da. Lehenbizi sartu behar da, eta gainera ondu jokatu. Dena den, hau oso herri handia da eta jende asko dogu atzetik. Pentsetan dot jendeak lagunduko dauela, eta 2.Ara igoz gero oraingo bazkide kopurua 2.800 edo- dobla edo triplika liteke. Noski, joku aldetik ez badago maila handirik, ez gara sekula 2.An egongo, baina aukerak dagoz.

Eta zer deritzozu Barakaldoko afizioari? Ez al gara hotzegiak taldearekin?

Izan, nahiko kritikoak zarete, batzuetan kantsagarriak ere ondo jokatzen ez badozu. Baina gero, asko kanpora joaten dira taldea animatzen, nahiz eta etxean hotzagoak diren. Dena den hori ez da hemen bakarrik gertatzen, orain 2000 ikusle inguru etortzen dira partiduetara, eta play off-en sartzen bagara 5000 edo 6000 etorriko dira. Orduan herri guztiak sakatu egingo dau.

2.An badaude 1. mailan ibilitako taldeak (Athletico de Madrid...), gainera diru asko dutenak... Gai al da Barakaldo horrelako taldeekin lehiatzeko?

Beharbada ez gara euren parean egongo, baina lau edo bost talde kentzen badozu, aurrekontu handia daukienak, handik behera hamar bat talde gara, oso gitxi, eta danak erdi berdinak gara. Jakina, gauzak ondo behar doguz egin, ondo pentsatu eta diru gutxirekin... Athletic de Madridek igoal fitxaje bat egiten dau, gero bota fitxaje hori eta ez da ezer pasa, baina zuk igarri egin behar dozu, ezin dozu hutsik egin, ezta 2.Bn ere.

Lasesarre zaharra bota egin dute, eta San Bizenteko zelaian ari zarete. Nabaritzen al da hori jokuan?

Bai, hau (San Bizenteko zelaia) txikiagoa da. Egin kontu, Lasesarrek 31 m zuen zabalera eta 101 luzera, eta San Mamesek 38x105 m, zazpi metro bakarrik zabalago, baina hori asko da. Hori, tamainaren kontu hori alegia, pasaten jaku askotan San Bizenten, eta zelaia bera ere gogorragoa da, askotan ezin dozu gura dozun moduan jokatu, batez be beste taldea atzean sartzen bada. Zelai barriaren beharra dago, duda barik.

Kepa Zarraga

- Kepa Zarraga , jokalaria

Kepa Zarraga, Begoñako bilbotarra da eta 30 urte ditu. Hau bere seigarren denboraldia da Barakaldo FCn eta lehenago Bilbao Athletic eta Lemoa taldeetan ibilia da. Horrela ikusten du herriko taldea:

Zelan ikusten duzue aurtengo denboraldia?

Nik uste hau dela Barakaldok azken sei urteotan izan duen talderik onena. Badaude igoteko aukerak.

Horren goian egoteak ez al dakar ardura gehiegi jokalarientzat?

Ez, guztiz kontrakoa, goian egotea gauza polita da. Zenbat eta gorago egon askoz hobe, lasaiago jokatzen dugu.

Nolakoa da zure ustez Barakaldoko zaleen erantzuna?

Orain arte oso ona. Lehengo egunean Gasteizen jokatu genuen Aurreraren kontra, eta hemendik bostehun bat barakaldar joan ziren gu animatzera. Benetan ikusgarria izan zen , osora zelaian zazpiehun ikusle baino ez zelako egongo.

Denboraldi honetan Galizia eta Asturias aldeko taldeen multzoan sartu zaituztete. Hori kaltegarri izan daiteke zuentzat?

Esan liteke hobe dela guretzat: iazko taldeak (Gipuzkoakoak, Bizkaikoak...) gurearen oso antzekoak ziren eta neurri batean zaila zen haien kontra jokatzea, oso ondo ezagutzen dugulako elkar eta talde bakoitzak dakielako nolakoa den bestea. Orain, aldiz, sorpresarako bidea handiagoa da.

Gotzon Hermosilla, Esther Lafuente