Ikusi makusi zer ikusi? Galdera honetan mundu osoa sartu omen da, baina mundua ikusi ezezik azaldu beharra ere bada. Ikaslea ikusleaz gain ikertzailea ere bada eta bere zeregina errealitatearen konplexutasunaz interesatzearekin hasten dela esan daiteke.  

Munduaz interesatzea 

                Ikuspuntu honen zutabea errealitatearekiko atxikimendua da, ez soilik liburu eta bestelako zeharbideak, unibertso fisiko, matematiko, linguistiko edo artistikoarekiko harreman zuzena eta eginkorra baizik. Jakina, interesgarria denaz ohartarazi behar zaie ikasleei, hauxe irakaslearen betebehar garrantzitsua baita.  

                Badirudi ikaslea egiten duenaz interesatzen denean ulertzen duena azaltzen ahalegintzen dela eta hona hemen pentsamenduaren iturburu agortezina. 

Mundua azaltzea 

                Ez da kontu erraza. Aipatu puntuan indar bizi-biziak jarri omen dira baita makina bat nahi eta gogo ere. Oraingoan lan logikoa egiteko beharra bada. Mundua ulertzeko zenbait saioren ur nahasietan murgildu ohi da ikaslea hasierako nahaste borrasteari egitura logikoa bilatu nahian, hau da, ardatz ordenatzailea. 

                Prozesu emankor honek hezkuntza formala ezezik informala ere zipriztintzen du ikasgelako hormetatik at bidea zabalduz. Hauxe dugu, hain zuzen, ikerlan bat ongi garatzen ari den ebaluaziogaia. 

                Noski, ikertzailearen erritmoari aditzea ezinbestekoa iruditzen zaigu, baita bidean ikasleak sorturiko estrategia anitzak ere. Ikaslearen prozesu hau aldapatsua da sarritan eta lasterra beste zenbaitetan, baina zeharka meharka doan ibilbide oparoa. 

Den dena begibistan ez dagoen arren, irakaskuntzak, ikaskuntza hobetzeko ahaleginak egiten dituenean, ikaslearen pentsamenduaren gorabeherak begibistarazteko zenbait pauso eman ditzake. Ikaslea laguntzeko nahitaezkoa da, beraz, prozesu barnekoia kanporatzen dugun neurrian ikaste prozesuan eskuhar daiteke era zuzen eta egokiagoan.  

Muskizko Ikastolan betidanik ikaslearen pentsamenduaren sustraitze eta zabaltzeari so egin diegu eta gure pedagogiaren abiapuntu inportantenetarikoa da.

Pentsamenduaren sozializazioa 

Ikasleak bere pentsamenduak besteen aurrean argitu nahi ditu eta azaldu. Kanpo azalpenaren bidez bere burua bigarrenez azalduko du eta hasieran kontutan hartu ez dituen hamaika aspektu argituko ditu.  

Zalantzarik gabe ikasketaren zati handi bat azaltzen egiten den ahaleginei esker ekoiztu ohi da. Ikasleon pentsamenduek elkar jotzen dutenean  momentu aparta dugu, kalitate-erizpide ezinhobea, hainbat uste eta hipotesiren balioztapena. 

Kontzeptu  sarearen berreraketa 

Baina magma sutsu eta norabide anitzeko honetatik nora iritsiko da? Antza denez, ikaslearen ideiak elkarkideek aintzat hartzen dituztenean, ikaslearen autoirudiak eboluzio onuragarria jo ohi du. Gainera,  azalpen osatu berria, hau da, beste  ikasleen kontzeptuekin batera eratu duena, ikaslearen kontzeptu-sarearen barruan txertatzen da. Honela, azalpen berriak,  alor hori astintzeaz gain, haurrak dakien guztiaren sare geldiezina berregituratzen da, kontextualizazio prozesu etengabean. Jira-bira mugagabean ikaslearen pentsamendua garatuz doa , gero eta sare konplexuagoaren jabea izanik. 

Mundua hobetu

Baina, nora garamatza munduaren esplorazioak? Errealitatea ezagutzeaz gain, bera aldatzeko saiakerak ere burutu behar dira. Muskizko Ikastolak partaidetza eta balio hezkuntzari sekulako garrantzia ematen die, ikasleak etorkizuneko hiritarrak baitira. 

Ikusi makusi, zer ikusi? Zer ikasi? Nola? Noiz? Zertarako? Zerekin? Guk ikerkuntza irakaskuntzari heltzeko perspektiba orokortzat jotzen dugu, ez arlo baten metodologia gisa soilik. Horrexegatik, proiektu anitz burutzen ditugu ikaslearen garapen físico, intelektuala, afektibo eta sozialari eusteko. Gainera,  ikerlanek ikasgelak kolorez eta erritmoz  hornitzen dituzte. 

Mundua zain dago eta gu bera ulertzeko irrikan. Dudarik gabe, ikaste-irakaste prozesua miragarria da, abentura paregabea, jaio garenetik dugun ibilbide aberatsenetariko bat. Hala bedi!