Ikastolan, eskola giroa euskaldundu asmoz eta hizkuntzarekiko klase emankizun formalez gainera, hizkuntz lanketarako ariketa bizi eta naturalak garatu nahian hainbat ekintza antolatzen eta burutzen ari gara. Dramatizazioa (txotxongiloen bidez edo haurren antzezpena) da ekintza horietako bat.

Antzezteak euskeraren menperakuntzan posibilitate handiak eskeintzen ditu. Testua ikasi beharrak, ondo ahoskatzeak, hitza eta keinuak, tonua eta mugimendua batera kontrolatu behar izateak ematen diote haurrari hizkuntzaren arlo formalarekiko sentsibilitate berezia. Ahozko hizkuntzari ekiteko oso bide ona dugu antzerkia, idatzitakoa lantzeko ere oso interesgarria, zenbait elementurekin konstziente izateko aukera ezin hobea eskaintzen baitu.

Hezkuntza Sailak antzerkiak irakaskuntzan izan dezakeen balioaz ohartuta, ESKOLA ANTZERKIGINTZA bultzatzen du NOLEGA progamaren bidez. Ikastolan Lehen Hezkuntzako 4. mailako ikasleak dira proiektu honen garatzaile.

Lehen Hezkuntzako umeekin bezainbat landu daiteke Haur Hezkuntzako ikasleekin ere, eginkizuna adin eta hizkuntz gaitasun desberdinetara egokituz:

• 3-4-5 urtekoak: haurrek gauzak izaki bizidunekin identifikatzen dituzte, gauza batzuk itxuraldatzea onartuz, animalien rolek izugarrizko erakarpena sortzen dietelarik. Ezaugarri hauen aurrean, oso gidoi sinple eta elkarrizketa laburretara jo behar da, zatirik garrantzitsuenak errepikatzeko teknika baliatu, "klitxeak" (sorgin gaiztoa, amaiera ona, ...) onartu, elementu beldurgarriekin kontu izan,...
• 6-7-8 urtekoak: aurreko gustuek iraun arren, gauzen arteko zerikusiez jabetzen dira. Lan konplexuagoak behar dituzte, ekintzaren beharra, zerbait gertatu behar du. Fantasiazko elementuak sar daitezke, beldurrezko pertsonaiak, emozioa. Klitxeak ere apurtu daitezke eta efektu bereziak sartzeko modua dago.

• 9-10-11 urtekoak: aurrekoetan ere gauzatu daitekeen arren, adin honekin bete- betean azaltzen da haur-gaztetxo mugako hauek asmatzaile eta gidoi egile gisa duten gaitasuna. Gauza zoragarriak gertagarriekin identifikatzen hasten dira, gai historiko, biografikoak eta abar adin horien azken atalean kokatu behar direlarik.

Hizkuntza inguruko lorpenak lehentasuna badute ere, antzerkiak eskeintzen dizkigun bestelako onurak ere baloratzen ditugu ezin baitugu ahaztu beste hainbat helburu lortzen lagundu diezagukeela:

• Helburu didaktikoak, edozein eduki irakasteko egokitu baitaiteke baliabide hau.
• Helburu pedagogikoak, maila pertsonalean nortasuna, inibizioak gainditzea... eta gizarte mailan talde lana sustatzea, guztiek helburu bat erdiesteko bat egitea, bakoitzak bere ahalegin eta ekarpenak eskainiz.
• Helburu olgetaria, gizaki orok (eta haurtzaroan oraindik erabat erreprimitu barik) duen jolaserako premiari erantzuteko eta, azken finean, helburu didaktiko zein pedagogikoak modu aktibo, atsegin eta bizian eskuratuz.