Karrera askotan asignatura guztiak euskaraz egiten badira ere, Nora eta Iñakiren kasuetan adibidez, ez da beti hala gertatzen. "Ni hasi nintzenean, lehenengo ikasturtea baino ezin izan nuen euskaraz egin, baina orain gauzak dexente aldatu dira" adierazten digu Saioak. Edonola ere, hizkuntza ez da arazoa izaten, "hiztegia-eta moldatu behar duzu baina berehala ohitzen zara. Nik neuk ez dut inolako arazorik izan asignaturak gazteleraz egin ditudanean", esaten du Estibalizek.
Askotan, gainera, euskara aberasteko tresna ere bihurtu da Unibertsitatea. Bertan, Euskal Herri osoko ikasleak biltzen dira eta "batzuetan gipuzkeraz eta bizkaieraz sarriago entzuten duzu batua baino eta zure hizkera ere moldatzen duzu" dio Iñakik. Bestalde, gehienek Euskara Tekniko-Zientifikoa izeneko arloa egin dute hizkuntza maila euren arloetako eskakizun zientifikoetara egokituz.
Lagun
hauetako batzuk dagoenekoz lan munduan murgildurik daude.
Norak, esaterako, BBK-n dihardu lanean, Saioak Megasoft
izeneko enpresan eta Iñakik kontabilitate lanak egiten
ditu. Unibertsitatean ikasitakoa eta gero aurkitzen dena ez datoz beti bat. Aitziberrek, praktikak amaitu berriak dituela, zera esaten digu, lanean egon arte ez zarela dituzun hutsuneez jabetzen. Hau da, "praktikan ikasten da, klasean oinarri bat eskuratzen den arren", Evaren iritziz. Ohiko eskola magistralak arruntak dira oraindik ere. Hala ere, kasu praktikoen azterketa sarri egiten dela adierazten digu Susanak. Lanariz buruz ari garela, gure lagunak bat datoz zera esatean, karrera aukeratzeko orduan gerora lana topatzeko erreztasunak edo zailtasunak ez zituztela kontutan hartu. Hautaketa, ostera, gusto, moda, lagun eta gurasoen arabera izaten da askotan baina "informazioa ezinbestekoa da" diosku Estibalizek, "bestela gero ustekabeak egon daitezke, gauzak ez baitira aurretik pentsatzen zenuen moduan edo esan dizuten eran izaten". |
|
|
Etorkizunerako
igurikapenak desberdinak dira. Evari elikagaien
teknologia interesatzen zaio eta Biologia amaiturik arlo
hori jorratu nahi luke. Estibalizek argi eta garbi dauka irakaskuntzan ikusten duela bere burua. "Irakaskuntza izugarri gustatzen zait eta gaur egun ere eskola batzuk ematen ditut. Falta zaidan asignatura gainditu bezain pronto, ikastetxeren batetan sartzen saiatuko naiz". Bestelakoa da Susanak aukeratu duen bidea. Zuzenbide ikasketak amaitu berri dituela, oposaketa batzuk prestatzeari ekin dio. "Fiskala edo epailea izateko oposaketak prestatzen ari naiz. Niri arlo penala atsegin zait eta gogorra dela jakin arren, horretan ahaleginduko naiz" esaten digu Susana. Aitziberrek Enpresen Administrazioa eta Zuzendaritza izeneko berezitasuna egiten ari da eta arlo horretan lan egin nahi luke. Badaki, hala ere, zaila izango dena, "harri bat altxatu eta ekonomilaria agertzen zaizu". |
