Hau da Aranda de Dueron 2001eko martxoaren 24an egindako lehiaketan "Latak kanpora" proba irabazi zuen robota. Proba honetan, irudiko arearen barruan bi lata zuri zeuden (freskagarrien latak). Bakoitzak 50 g-ko pisua zuen (horretarako, antolatzaileak argizaria sartu zuen 50 g-ko pisura iritsi arte). Laten posizioa hasi aurretik bertara jaurtikitako bi txanponek erabaki zuten. Robotak R posiziotik abiatu behar ziren, eta bi latak laukitik atera behar zituen. Bi aukera edo kategoria zeuden: lehenean nahikoa zen latak bultza eginez ateratzea, eta bigarrenean, lurretik altxatu behar ziren kanpora eramateko. Proba honetan bost pertsonek hartu genuen parte.

Irudian eraman nuen robota ikus daiteke. Egiturari dagokionez sendoa egiten saiatu nintzen, erraz desmuntatzen ez dena. Pintza egiteko abiapuntua Jonathan B. Knudsen-ek "The Unofficial Guide to LEGO MINDSTORMS Robots" liburuan deskribatzen duen Minerva izeneko robota izan zen. Mekanismo horri esker, motore bakar batez pintza itxi eta altxa daiteke. Egokitzapen ugari egin behar izan nizkion latarekin erabilgarria izateko. Pintzaren erdiko aldean ukitze sentsore bat jarri nion lata antzemateko.

Oinarri mugikorra sendoa da, eta pisua atzeko aldean jartzen saiatu nintzen, lata altxatzean arazorik ez egoteko. Azpian argi-sentsore bat zeraman marra antzemateko.

Eta aipa daitekeen hirugarren berezitasuna antenena da. Horren zabala den arean bi lata aurkitzea ez da erraza. Robota diseinatzeko garaian bi aukera zeuden: robot itsua edo begibakarra erabiltzea. Begibakarra egiteko argi-sentsore bat erabil zitekeen latak ikutu gabe detektatzeko, baina hainbat proba egin ondoren emaitzak ez ziren onak izan. Honen ondorioz robot itsua egitea pentsatu nuen. Eta, zer egiten du itsu batek makilaz zerbait aurkitu nahi duenean? Makila alde batera edo bestera mugitu. Beraz, aldeetara hala edo nola zabaldu behar nuen egitura eta bi antena jartzea erabaki nuen. Bakoitzari ukitze sentsore bat erantsi eta honela 86 cm-ko egitura lortu nuen. Honela, lataren ondotik pasatzean antzemateko aukera izango nuen.

Behin lata hartuta, kanpora ateratzen zuen, laukitik 40 cm ingurura. Honen arrazoia, antenekin arazorik ez izatea izan zen.

Robot hau MLCad erabiliz marraztu dut. Artxiboarekin batera erabilitako programa dago (Visual Basic erabili nuen).