LEGO 1977an TECHNIC serieak komertzializatzen hasi zen. TECHNIC serieko modeloek besteak beste engranajeak, poleak, ardatzak eta motoreak zeuzkaten. Pieza multzo hauek LEGOen erabilpen teknikoari sarrera eman zioten. Urtez urte pieza berriak atera dira eta gaur egun, transmisio mekanikoak egiteko piezez gain, transmisio pneumatikoak egiteko elementuak eskaintzen dituzte. LEGO Dacta seriean hezkuntzari egokitutako materialak merkaturatu zituzten, eta hainbat herrialdetan teknologiako edukiak lantzeko erabiltzen hasi ziren.

1998an MIT-ekin batera egindako lanaren emaitza komertzializatu zuen: "Robotics Invention System". Honi esker, kontrol gaitasuna makinaren barruan kokatua duten robot autonomoak eraiki ditzake erabiltzaileak.

Baina LEGO MindStorms-ekin batera saltzen den softwarea mugatu samarra zen, eta erabiltzaile batzuek (haien artean ingeniariak, informatikoak...) RCX programatzeko inguru berriak garatzeari ekin zioten eta kasu guztietan emaitzak Internet-en kokatzen zituzten gainerako erabiltzaileen eskura. Guzti honen ondorioz, gaur egun, RCX programatzeko dagoen aukera oso zabala da: NQC, C, Ada, Java...

2006an sistemaren bigarren belaunaldia iritsi da, LEGO MindStorms NXT izenekoa. Hardwarean eta softwarean hobekuntzak eskaintzeaz gain, sistema ireki bat eskaini du LEGOk: hasieratik softwarea eta periferiko berriak garatzeko behar den informazio guztia eskaini du bere webgunean.

Spybotics LEGOk robotak egiteko komertzializatu duen beste sistema bat da. Ipar Euskal Herrian komertzializatuta dago baina hegoan ezin da dendetan aurkitu. Poliki-poliki Spybotics programatzeko baliabide berriak argitaratu dira. LEGOk bere webgunean LEGO MindStorms SDK 2.5 argitaratu du, bertan Spybotics-en datu teknikoak jasotzen dira.

Bestetik, NQC tresna paregabea bilakatu da Spybotics programatzeko. Bricx Command Center-ekin batera eskaintzen den Programatzailearen gidan (3.0a1 bertsioan) Spybotics programatzeko behar dena aurki daiteke.

Ingelesez argitaratutako LEGO Spybotics Secret Agent Training Manual liburuan Spybotics-i buruzko informazio ezberdinak aurki daitezke.

Loturak

• "LEGO MindStorms"-en Web ofizialaren bitartez mundu osoko jendeak egindako proiektuak ikus daitezke.
• LEGOrekin robotak egiteko informazio iturri gehienek LUGNET izeneko Web gunea dute jatorria. Programazioa, mekanika, norberak egindako sentsore berriak, pneumatika.
• Proiektu bereziren bat egin behar baduzu, eta horretarako piezak ez badituzu aurkitzen jo ezazu Brick Link-era. Bertan mota guztietako piezak aurkituko dituzu salgai.