antzezkizuna

	IPUIN LAPURRA TONI LA SALek izozkien postu gurpildun bat bultzatzen du. Herriko plaza bilatzen du, bertan jartzeko eta izozkiak saltzeko. Halako batean, telefono dei harrigarri bat jaso du. Esan diotenez, bere izozki-saltzaile arropa mozorroa baino ez da. Eta bere benetako eginkizuna... herriko banketxea lapurtzea da! TONI LA SAL, nahastuta eta ikaratuta, atraku batean sartuko da, baina okertu egingo da eta liburutegiko kutxa gotorra eramango du. Pinotxo, Otsoa, Txanogorritxu, Hiru Txerritxoetako azkarrena, Sorgina, Botadun Katua eta Lanparako Jeinua gaur TONI LA SALekin nahastuko dira, txotxongilo istorio zoro honetan, ustekabeko bukaera batekin. Posible al da ikus-entzuleak arratoi bihurtzea Hamelingo txirula joleak? TONI LA SAL hip-hop dantzatzen hasiko da? Kenduko al du kaskoa? Hori dena eta askozaz ere gehiago, ikuskizun interaktibo honetan.	TELEIPUINA Teleak erotzen gaitu!!! Etxera iritsi eta telebista pizten dugu. Telemandoak ez du hainbat telebisio katerako botoi beste. Sakatu! Aldatu! Hau koloretxo sorta hau! Aldatu berriro! Bai jende mordoa oihuz eztabaidaka! Bai jende mordoa gaizki kantaka! Sakatu! Bai txalo mordoa edozein ordutan! Nondik sartu dira ba mamorro guzti horiek telebista barrura? Teleak erotzen gaitu!!! Baina ez dirudi honek Toni La Sal batere arduratzen duenik. Nagusiak bere etxean telebisio emisore berrien seinaleak instalatzeko agindu dio, beraz, dena konplikatu egingo da Toni La Sal konturatzen denean eraman dituen trafiko seinaleek ezertarako balio ez dutela, “TDT”a ez dela insektizida bat eta handik ibiltzen diren txotxongiloak ez direla mamorroak, telebistaren aurrean ordu gehiegi ematen duten haurrak baizik. Ez galdu elkarreraginezko ikuskizun hau. Berriro ere kontu-kontalaria dirudi, baina ez da, nahiz eta Toni La Salek berriz kasko gorria buruan daraman; baten batzuek telesaioa dela diote baina... noiz ikusi da tele-ikusentzuleak zaku-lasterketetan eta dibertitzen?
		TONI LA SAL "Birusak erasoan!!!" antzezlanean Airez dela, doministiku edota usoen hegaden bidez; kablez dela, ordenagailuen bidez; edonondik datoz gure bizitza lohitzera. Baina... Nortzuk dira ba birus hauek? Eskolara joaten al dira? Maitemindu egiten dira? Zergatik dira hain txikiak? Baina guzti hau ez zaio bat ere axola Toni La Sali. Bera bere gauzetan dabil, hemendik hara, bere garbiketarako orgari bultzaka. Izango al da gizon hau horrenbesteko zikinkeria bakteriarrari aurre egiteko gai? Ez galdu elkarreraginezko ikuskizun hau ikusteko aukera. Kontu-kontalaria dirudi, baina ez da halakorik, nahiz eta Toni La Salek motorista kaskoa buruan jarri bere garbiketarako orga gidatzeko; ezta modan dauden umorezko bakarrizketa horietako bat ere, hemen ikuslegoak ez ditu soilik barre eta txaloak egingo; batzuek txotxongilo antzezlan baten aurrean gaudela diote, baina... Posible al da lanbas batek hitz egitea?

ANTZEZKIZUNA GINOL TALDEA Getxon 1980.garren urtean jaio zen, baina gaur egun Otxandion finkatu da. Gasteizko ANE AGIRRE PRODUKZIOAK-ek eskaintzen ditu bere antzezlan guztiak.

ANTZEZKIZUNA GINOL TALDEAk burutzen duen antzerkiak esku-marionetazko teknika tradizionalak bereganatu eta, aldi berean, teknika horiek eduki berriez betetzen ditu.

ANTZEZKIZUNA GINOL TALDEA Euskal Herriko herri askotan ibilia da, maiz bere lana auzoetako jaietan burutu duelarik. Zenbatezinezko irakats-zentru ere bisitatu du, eta baita kultur-mamiko zenbait erakusketa, aste eta ihardunaldietan parte hartu ere.