Anaitasunak beste garaipen garrantzitsu bat lortu zuen Txerloieko zelaian Idiazabal taldearen aurka mailari eusteko bidean. Xabier Artetxek partiduko zazpigarren minutuan sartutako gol goiztiar batekin aurreratu ziren azkoitiarrak. Bigarren zatiko hogeita laugarren minutua zen Xabier Artetxek berak Anaitasunaren bigarren gola sartu zuenean. Azken aldiko ohiturari jarraituz Oihan Martinez azpeitiarrak txartel gorria ikusi zuen eta beste behin taldea hamar jokalarirekin utzi zuen. Hala ere, Anaitasunak emaitzari eutsi ahal izan zion. Bi eta hutseko garaipenarekin Anaiatsuna sailkapeneko hamabigarren tokian aurkitzen da 36 punturekin. Bere atzetik ditu orain Idiazabal bera, Zumaiako, UPV Vaconia, Eibartarrak, Zestoa eta Touring. Datorren larunbatean Zumaiako taldearen aurka jokatuko du etxean eta bi aste barru Eibarrera joango da Eibartarrak taldearen aurka jokatzeko. Beraz, Anaitasunak denboraldi amaierari begira jokatu behar dituen hiru partiduetatik bi arerio zuzenen aurka izango dira. Azken hiru partiduak Aloña Mendi, Zestoa eta Idiazabalen aurka irabazi ondoren, datozen partiduak ere irabazteko egokiera baldin badu, preferente mailan gelditzea ziurtatuko luke. Gainontzeko emaitzak Erregio mailako taldeak 0-8 irabazi zuen larunbatean Oiartzunen eta honenbestez sailkapeneko lehenengo tokian aurkitzen da maila igotzeko aukerak dituelarik. Liga amaitzeko geratzen diren hiru partiduetako bat bigarren sailkatua dagoen Sanpedrotarra taldearen aurka izango da bi aste barru. Berebiziko partidua izango da bigarren sailkatuari aldea haunditzeko eta lehenengo erregio mailara igoera ziurtatu ahal izateko. Baina horretarako derrigorrezkoa da preferenteko taldeak ere maila mantentzea, bestela, bigarren erregio mailako taldeak ezingo luke maila igo horretarako meritu guztiak egin arren. Areto futbola Zurt Tabernak bosna berdindu zuen Aieteko taldearen aurka. Plaza Berri Sportek 8-6 galdu zuen UPV Inter taldearekin eta Prexkuk taldeak 7-1 irabazi zion etxean Amara Kirol Elkarteari.